الحمدللہ ہماری ویب سائٹ اور فیس بک پہ مختلف عمرکےقارئین روزانہ لا تعداد سوالات کرتے ہیں جو اپنی اسکن’ بال’ وزن اور میک اپ کے متعلق بہت کچھ جاننا چاہتے ہیں تو ہم نے سوچا کہ وہ تمام عام و خاص مسائل ہم ایک آرٹیکل کی شکل میں اپنے ان قارئین کے لئے بھی شائع کریں جو ہوسکتا ہےانہی مسائل کے شکار ہوں اور ہمارے جوابات سے کچھ استفادہ حاصل کرسکیں
نوٹ: کوئی بھی ٹریٹمنٹ/ٹوٹکہ آزمانے سے پہلے یہ بات ذہن میں رکھیں کے ہربل نیچرل ٹوٹکے کے سائیڈ ایفیکٹ نہ ہونے کے برابر ہوتے ہیں لیکن یہ اپنا مثبت اثر دکھانے میں تھوڑا وقت لیتےہیں اور یہ تمام دیسی علاج وغیرہ جو ہم بتاتے ہیں وہ ان کے لیے ہوتے ہیں جو کسی بھی طرح کے پیچیدہ امراض کے شکار نہ ہوں ان خواتین و حضرات کے لیے ہمارا پہلا مشورہ ڈاکٹر سے مکمل تسلی بخش چیک اپ کروانے کا ہوتا ہے!
:سوال
میرے چہرے پر بال ہیں جو بہت باریک روئیں کی طرح ہیں۔ میں نے انھیں موچنے کی مدد سے نکالنے کی کوشش کی لیکن کامیاب نہیں ہوئی۔ میں بیوٹی پارلر نہیں جا سکتی اور مجھے تھریڈنگ کرنا بھی نہیں آتی۔ کوئی آسان سا نسخہ بتائیں جس پر عمل کر کے یہ بال ختم ہو جائیں۔
:جواب
ایک خوبانی لے لیں اگر تازہ نہ ملے تو خشک خوبانی رات کو پانی میں بھگو دیں۔ نرم پڑ جائے تو اس کو اچھی طرح کُچل لیں۔ اس میں چائے کا ایک چمچ شہد ملا لیں۔ اب اس آمیزے کو چہرے پر لیپ لیں۔ جب خشک ہو جائے تو اتار دیں۔ یہ چہرے کے بالوں کی جڑوں کو کمزور کرتا رہتا ہے اور وہ خود بخود اُترنے لگتے ہیں۔ اس کے علاوہ یہ جلد کو غذائیت بھی فراہم کرتا ہے۔ چہرہ شاداب رہتا ہے اور چہرے پر جھریاں نہیں پڑتیں۔ یہ ماسک ہفتے میں تین دن باقاعدگی سے استعمال کریں۔ ان شا اللہ ایک ماہ میں نمایاں فرق محسوس کریں گی۔
:سوال
میرا مسئلہ بھی وہی ہے جو آج کل بیشتر خواتین کا ہے۔ میرا وزن بہت زیادہ ہے۔ شادی شدہ ہوں، تین بچے ہیں۔ میرا قد پانچ فٹ دو انچ اور وزن 65 کلو ہے۔ میں پیدل بھی چلتی ہوں۔ گھر کے سارے کام خود کرتی ہوں۔ خوراک بھی بہت زیادہ نہیں، اس کے باوجود وزن میں اضافہ ہوتا جا رہا ہے۔ مجھے کوئی ایسا نسخہ بتائیں جس پر عمل کر کے اپنا وزن کم کر سکوں۔ میں سلمنگ سینٹر نہیں جا سکتی نہ ہی ورزش کر سکتی ہوں کیونکہ تین بچوں کے ساتھ وقت نکالنا بہت مشکل ہے۔
:جواب
آپ گائے کا گوشت، گردہ، کلیجی، مز، بیکری کی تمام اشیا، مٹھائیاں، چینی، خشک میوے اور کولڈ ڈرنک کا استعمال بالکل بند کر دیں۔ کھانے میں صرف ایک روٹی بغیر چھنے آٹے کی کھائیں۔ دودھ بالائی اتار کر پیئیں۔ مرغی اور بکرے کا گوشت استعمال کر سکتی ہیں لیکن کم چکنائی کے ساتھ۔ چاول اُبالیں تو پانی نکال دیں۔ سبزیاں اور پھل زیادہ استعمال کریں۔
صبح و شام ایک عدد لیموں ایک گلاس پانی میں نچوڑ کر استعمال کریں۔ نہار منہ ایک گلاس نیم گرم پانی میں چائے کا ایک چمچ شہد ملا کر پیئیں۔ دو چمچ اسپغول کی بھوسی دو گلاس پانی میں ڈال کر صبح شام استعمال کریں۔ جلد ہی فرق محسوس کریں گی۔ اگر ممکن ہو تو کسی ڈاکٹر سے مشورہ کر لیں۔ کبھی کبھی موٹاپے کی وجہ تھائی رائڈ گلینڈ کا مسئلہ بھی ہوتا ہے۔
:سوال
میری ناک چہرے کے لحاظ سے بہت چھوٹی ہے، دراصل بچپن میں ناک پر چوٹ لگنے سے اس کی شکل بگڑ گئی تھی جو وقت کے ساتھ ساتھ نمایاں ہوتی گئی۔ کیا ایسا کوئی طریقہ ہے جس سے ناک کا یہ نقص دُور کیا جا سکے؟
جواب: میک اپ کے ذریعے اس نقص کو کسی حد تک دبایا جا سکتا ہے لیکن اگر یہ زیادہ نمایاں ہے تو پھر ایک ہی طریقہ ہے کہ اس کی پلاسٹک سرجری کرائی جائے۔ اس کے لیے کئی پرائیویٹ اسپتال ہیں جہاں سرجری کی سہولت موجود ہے۔ آپ وہاں کسی اچھے ڈآکٹر سے مشورہ کر لیں، وہ آپ کو تمام تفصیلات سے آگاہ کر دیں۔
اس کے لیے آپ کو چار سے پانچ دن تک اسپتال میں رہنا ہو گا اور دو ہفتے تک ناک پر پلاسٹر چڑھا رہے گا، اسے آپ ایک طرح آپریشن ہی سمجھیں۔ یہی آپ کے مسئلے کا مستقل حل ہے۔
:سوال
میری عمر تیس سال ہے لیکن آنکھوں کے نیچے کی جلد پھول گئی ہے جس کی بنا پر میں اپنی عمر سے بہت زیادہ نظر آتی ہوں۔ کوئی ایسا نسخہ بتائیں کہ میں اس سے نجات حاصل کر سکوں۔
:جواب
اسے آنکھوں کے نیچے تھیلیاں بننا کہتے ہیں۔ عموماً یہ موروثی ہوتی ہیں۔ ان کے ظاہر ہونے کی کئی وجوہات ہوتی ہیں۔ گردوں اور یورین کے انفیکشن کی وجہ سے بھی ایسا ہوتا ہے، آنکھوں کے اردگرد کی جگہ بہت نازک ہوتی ہے اس میں لچک بھی کم ہوتی ہے اس لیے یہ جلد پھول جاتی ہے۔ آپ ڈاکٹر سے مشورہ ضرور کریں۔
چائے اور کافی کا استعمال کم کر دیں۔ پانی زیادہ سے زیادہ پیئیں۔ روزانہ کم از کم سولہ گلاس پانی پیئیں۔ آنکھوں کے گرد کوئی بھاری کریم نہ لگائیں۔
ایک آلو لے کر اچھی طرح دھوئیں پھر اس کے باریک قتلے کاٹ کر آنکھوں پر رکھیں۔ اس سے کافی فرق پڑے گا۔ کھیرے کا رس لگانے سے بھی یہ تھیلیاں کم ہو جاتی ہیں البتہ اگر یہ موروثی ہیں تو صرف کاسمیٹک سرجری سے ہی ختم ہو سکتی ہیں۔
:سوال
میرے بال اُڑے اُڑے سے نظر آتے ہیں۔ بالوں کے دو منہ بن گئے ہیں۔ بال بدرنگ اور کھردرے بھی ہیں۔ اس لیے گھنے اور لمبے ہونے کے باوجود خوب صورت نظر نہیں آتے۔ پہلے میرے بال گھنگھریالے تھے۔ میں نے انھیں سیدھا کرایا اور اسٹریکنگ بھی کرائی۔ اس کے بعد بالوں کا یہ حشر ہو گیا ہے۔ کیا کوئی ایسی صورت ہے کہ بال چمکدار اور دلکش نظر آئیں؟
:جواب
کنڈیشنگ بالوں کو غذائیت فراہم کرنے کا ایک انتہائی مفید طریقہ ہے۔ یہ بالوں کو ہموار کرتا ہے اور اس سے بالوں میں چمک بھی پیدا ہوتی ہے۔
استعمال شدہ چائے کی پتی پانی میں دوبارہ اُبال کر چھان لیں۔ ٹھنڈا ہونے پر شیمپو کرنے کے بعد اس پانی سے سر دھوئیں۔
ایک مگ پانی میں ایک لیموں کا رس ملائیں اور سر دھونے کے بعد آخر میں اسے بالوں پر ڈالیں۔
مہندی بھی بہترین کنڈیشنر میں سے ایک ہے۔ اس کے استعمال سے بھی بہت سے فوائد ہوتے ہیں۔
مہندی میں ایک لیموں کا رس، ایک انڈا اور چائے کا ایک چمچ دہی ملا کر لگائیں۔ بالوں میں نہایت دلکش چمک پیدا ہو جائے گی۔
مہندی کے پیسٹ میں چائے کا ایک چمچ خالص ناریل یا زیتون کا تیل ملا کر بالوں میں لگائیں۔ آدھے گھنٹے بعد سر دھو لیں۔
مہندی لگانے لگانے سے نہ صرف بالوں کی ساخت ہموار، ریشمی اور چمک دار ہو جاتی ہے بلکہ بال گھنے بھی نظر آنے لگتے ہیں۔
:سوال
میرا مسئلہ یہ ہے کہ چند مہینے پہلے میرا منہ بالکل صاف و شفاف تھا لیکن اب چند دنوں سے میرے منہ پر بہت زیادہ تل نکل رہے ہیں جو دُور سے پتا نہیں چلتے لیکن نزدیک سے نظر آتے ہیں۔ پلیز مجھے کوئی طریقہ بتائیں کہ میرا منہ صاف ہو جائے اور تل ختم ہو جائیں۔ چہرے کو فریش رکھنے کا کوئی طریقہ بھی بتائیں۔
:جواب
تلوں کے لیے آپ فوری طور پر ڈاکٹر سے مشورہ کریں۔ دھوپ میں نکلنے سے پرہیز کریں۔ دھوپ کی وجہ سے ان تلوں میں اضافہ ہو سکتا ہے۔ گرمی کے موسم میں چہرہ چکنا ہو جاتا ہے اور شدید گرمی میں چہرے کا رنگ بھی خراب ہو جاتا ہے۔ چہرے سے گرمی کے اثرات ختم کرنے کے لیے ہفتے میں دو مرتبہ کھیرے کا ماسک لگائیں۔ کھیرا لے کر اس کا جوس نکال لیں اور اس کو روئی سے پورے چہرے پر لگائیں۔ ایک گھنٹے تک لگا رہنے دیں پھر ٹھنڈے پانی سے دھو لیں۔ گرمی کے اثرات ختم ہو جائیں گے۔
موسم گرما میں عرقِ گلاب بھی بہت مفید ہے۔ عرق گلاب میں بیسن ملا کر پیسٹ بنائیں اور اسے چہرے پر لگائیں۔ بیس منٹ بعد ٹھنڈے پانی سے چہرہ دھو لیں۔ اس طرح نہ صرف آپ کے چہرے کو تازگی ملے گی بلکہ فالتو چکنائی بھی غائب ہو جائے گی۔
:سوال
میری عمر تیس سال ہے، قد پانچ فٹ دو انچ ہے۔ میرا وزن ساٹھ کلو تھا، میں نے ڈائٹنگ کی اور کھانا بہت کم کر دیا۔ اس سے میرا وزن پچاس کلو ہو گیا لیکن میں بے حد کمزوری محسوس کرتی ہوں۔ تھوڑا سا کام کرنے سے تھک جاتی ہوں۔ ٹانگوں میں درد رہتا ہے، آنکھوں کے گرد حلقے اور چہرے پر چھائیاں ہو گئی ہیں۔ ڈاکٹر کہتے ہیں کھانے پینے پر توجہ دیں۔ مجھے ڈر ہے کہ اگر میں نے پہلے کی طرح کھانا پینا شروع کر دیا تو دوبارہ وزن بڑھ جائے گا۔ مجھے کیا کرنا چاہیے؟
:جواب
موٹاپا اچھی چیز نہیں ہے لیکن حد سے زیادہ دُبلا پن بھی اچھا نہیں لگتا۔ خاص طور پر جب یہ جسمانی کمزوری کی حدوں کو چُھونے لگے۔
آج کل کی لڑکیوں پر دُبلا ہونے کا خبط سوار ہو گیا ہے، اس مقصد کے لیے وہ سارا سارا دن کچھ نہیں کھاتیں، اس سے نہ صرف وہ جسمانی طور پر کمزوری محسوس کرتی ہیں بلکہ چہرے کی شادابی اور رونق بھی رخصت ہو جاتی ہے۔
اگر آپ وزن کم کرنا چاہتی ہیں تو بہتر یہ ہے کہ مناسب ورزش اور چہل قدمی پر توجہ دیں۔ اگر اس سے خاطرہ خواہ رزلٹ برآمد نہ ہو تو پھر ڈائٹنگ کریں، لیکن ڈائٹنگ کرتے ہوئے یہ خیال رکھیں کہ آپ کی غذا میں تمام ضروری غزائی اجزا شامل ہوں۔
شکر اور شکر سے بنی ہوئی اشیا جیسے کہ مٹھائیاں بالکل ترک کر دیں۔
تلی ہوئی اشیا جیسے کہ پراٹھا، پیٹیز، سمسوسے، پیسٹری نہ کھائیں۔
دودھ بالائی اُتار کر پئیں۔ دہی اور پھلوں کا استعمال باقاعدگی سے کریں۔ کھانا کھانے کے درمیانی وقفوں میں کچھ نہ کھائیں۔ ان ہدایات پر عمل کرنے سے آپ کا وزن تیزی سے کم نہیں ہو گا۔
لیکن اس میں اچھی بات یہ ہے کہ چہرہ تروتازہ اور شاداب رہے گا اور آپ جسمانی طور پر خود کو تندرست و توانا محسوس کریں گی۔
:سوال
میری آنکھیں سوجی ہوئی اور بے رونق نظر آتی ہیں آنکھوں کے گرد سیاہ
حلقے بھی ہیں۔ کبھی کبھی پیلی لگنے لگتی ہیں۔ بال بھی خشک، روکھے
اور بے جان ہیں خصوصاً سردیوں میں بہت خراب ہو جاتے ہیں۔
:جواب
سب سے پہلے تو اپنی خوراک پر توجہ دیں۔ چکنی، تلی ہوئی بیکری کی
اشیا کھانا کم کر دیں۔ غذا میں پھل، دودھ اور سبزیاں زیادہ مقدار
میں شامل کریں۔ آج کل گاجروں کا موسم ہے، جتنا زیادہ ممکن ہو کچی
گاجریں کھائیں۔ گاجر کا رس ویسے بھی آنکھوں میں چمک پیدا کرتا ہے۔
جلد کو نکھارتا ہے۔ صحت مند آنکھوں کے لیے وٹامن اے بھی بہت ضروری
ہے۔ وٹامن اے انڈے کی زردی، مچھلی، مکھن اور سبز پتوں والی سبزیوں
میں پایا جاتا ہے۔
آنکھوں میں چمک نہ ہونے کی ایک وجہ نیند کی کمی ہے۔ اچھی صحت، شفاف
جلد اور چمکدار آنکھوں کے لیے آٹھ گھنٹے کی نیند لازمی ہے۔ آنکھوں
کے گرد بادام کا تیل لگا کر بہت نرم ہاتھوں سے ہلکے ہلکے مساج
کریں۔ کھیرے کے قتلے پتلے پتلے کاٹ کر آنکھوں پر رکھیں۔ آنکھیں
روشن اور چمکدار نظر آئیں گی۔
بالوں کے لیے درج ذیل نسخہ استعمال کریں:
دہی ایک چھٹانک
انڈا ایک عدد
لیموں کا عرق ایک چمچ
انڈے اور دہی کو اچھی طرح پھینٹ کر ملا لیں۔ پھر اس میں لیموں کا
عرق بھی ملا لیں اور بالوں میں اس طرح لگائیں کہ جڑوں تک پہنچ
جائیں۔ پندرہ منٹ لگا رہنے دیں، پھر نیم گرم پانی اور شیمپو سے دھو
لیں۔
ہفتے میں ایک بار یہ عمل کرنے سے بال خوب صورت، نرم اور چمکدار ہو
جائیں گے۔
مہینے میں ایک بار مہندی لگانا بھی بالوں کے لیے بہت مفید ہے
Did you find it useful, why not Share with Friends and Family: